ম’বাইলৰ নিচাত আচ্ছন্ন !! মানচেষ্টাৰলৈ যাওক!

মহাবাহু

লণ্ডনঃ ম’বাইলৰ প্ৰচণ্ড আসক্তিৰপৰা যদিহে কোনোপধ্যেই অলপো মুক্ত হ’ব পৰা নাই, চিন্তাৰ কোনো কাৰণ নাই— মানচেষ্টাৰলৈ যাওক। যদিহে ৰাস্তাত খোজ কাঢ়ি থাকোতেও ম’বাইলৰ আসক্তিৰ বাবে গাড়ী-ঘোৰা একোকে নেদেখা হৈছে, চিন্তা নকৰিব, মানচেষ্টাৰলৈ যাওক।

          আজিকালি ম’বাইল-আসক্তিৰ বাবে বহুতেই নিজৰ বিপদ নিজে আমন্ত্ৰণ কৰি আছে। ব্যস্ত ৰাজপথত খোজ কাঢ়োতে, গাড়ী চলাওঁতে ম’বাইলৰ পৰ্দাত মুখ গুঁজি থকাৰ ফলত কিমান যে দুৰ্ঘটনা হ’বলৈ ধৰিছে, ঠিকনা নাই। কোন মুহূৰ্তত প্ৰাণবায়ু নিৰ্গত হয়, তাৰো ঠিক নাই। অকল্পনীয় ‘ম’বাইল সভ্যতা’ৰ প্ৰভাৱত লাখ লাখ মানুহ এই নিচাত আচ্ছন্ন হৈ পৰিছে। পথত হয়তো ২ মিনিট খোজকাঢ়িছে, তাৰ পিছত ম’বাইলৰ পৰ্দাত দৃষ্টি নিক্ষেপ কৰিছে, ৰৈ গৈছে, কোনোবাৰ শৰীৰত খুন্দা মাৰিছে, সন্মুখত মানুহ গাড়ী-চাইকেল-ঘোঁৰা— একো নেদেখা হৈছে; এনেবোৰ দৃশ্য এতিয়া একেবাৰে সুলভ।

          এই নিচাসক্তসকলৰ কথা চিন্তা কৰিয়েই মানচেষ্টাৰত এটা সুকীয়াকৈ পথ নিৰ্মাণ কৰা হৈছে। মানচেষ্টাৰৰ ‘স্পিনিংফিল্ড’ অঞ্চলত তৈয়াৰ হৈছে দুটা ৭৫ ফুটৰ পথ— যি দুটা পথ পদপথৰ কাষেৰে সমান্তৰালকৈ আছে। মসৃণ আৰু মুকলি এই পথেৰে খোজ কাঢ়োতে নিশ্চিন্তমনেৰে ফোনৰ পৰ্দাত চকু দি গৈ থাকিব পাৰিব ম’বাইলৰ নিচাসক্তসকলে। কাৰণ এই পথেৰে কোনো ধৰণৰ গাড়ী-চাইকেল-ঘোঁৰা আহ-যাহ নকৰিব। অবাঞ্ছিত ভিৰ নাথাকিব। পথটোৰ নাম দিয়া হৈছে—‘Slow lane’ (মন্থৰ আলি)। কেৱলমাত্ৰ ম’বাইল ব্যৱহাৰকাৰীৰ বাবেই এই পথটো তৈয়াৰ কৰা হৈছে।

সমীক্ষাত কোৱা হৈছে যে এই তথ্য-বিস্ফোৰণৰ যুগত হাতৰ মুঠিত থকা চেনেহৰ ম’বাইল ফোনটো এতিয়া কেৱল আড্ডা, বিনোদন, সময় কটোৱা বা গেম খেলাৰ উপকৰণ হৈ থকা নাই। বিশ্বৰ নানা তথ্য, বিভিন্ন সময়ত খুঁচৰি থকাৰ নিচা এতিয়া বহুতৰে হৈছে। স্মাৰ্টফোনত এতিয়া মাথোঁ ‘চেল্ফি’ উঠিবলৈ গৈ বা ‘গেম’ খেলিবলৈ গৈয়েই নহয়, অত্যন্ত প্ৰয়োজনীয় কামত ‘নেট’ খুঁচৰিবলৈ ধৰি দুৰ্ঘটনাৰ চিকাৰ বহুজন হৈছে। গৱেষণাত প্ৰকাশ পাইছে যে কেৱল ব্ৰিটেইনতেই ৭৫ শতাংশ মানুহে পথত খোজ কাঢ়ি থাকোতে ম’বাইলৰ পৰ্দাত দৃষ্টি নিক্ষেপ কৰি থাকে। সেয়েহে কোনোজনে ‘লেম্পপোষ্ট’ত খুন্দা খায়, কোনোবাই বেলেগৰ কান্ধত পৰে, কোনোবাই গাড়ীৰ-চাইকেলৰ খুন্দা খায়, কিছুমানে অসতৰ্ক পদক্ষেপৰ বাবে উজুটি খায়। ব্ৰিটেইনৰ তথ্যই প্ৰকাশ কৰিছে যে মানুহে মানুহক খুন্দা মৰাৰ সংখ্যা ৬৫ শতাংশ। এইসকলৰ ৩৮ শতাংশ অনুতপ্ত হৈ ‘sorry’ শব্দৰ প্ৰয়োগ কৰে। বাকী ২৭ শতাংশৰ সেইখিনি ‘চেতনা’ও নাথাকে— ভবাৰ সময় নাই।

বিশেষজ্ঞসকলে কৈছে যে এনেবোৰ পৰিসংখ্যা মাথোঁ সংখ্যাতত্ত্ব নহয়, এইবোৰ সমাজৰ বাবে ক্ৰমশঃ বিপদজনক হৈ উঠিছে। বিশেষকৈ খোজ কাঢ়ি থাকোতে পদে পদে দুৰ্ঘটনাৰ আশংকা থাকে। সেইবাবেই পৰীক্ষামূলকভাৱে মানচেষ্টাৰৰ এই বিশেষ পথ তৈয়াৰ কৰা হৈছে। এনে অভিনৱ পন্থা যাৰ মস্তিষ্কপ্ৰসূত, তেওঁ হ’ল মানচেষ্টাৰৰ ‘এড’ ম’বাইল সংস্থাৰ মেনেজিং ডাইৰেক্টৰ ৰিচাৰ্ড ব্যাসেনডেল। তেওঁ কৈছে যে — ‘আমি বাস্তৱ অৱস্থা বুজি পাব লাগিব। সমাজৰ পৰিৱৰ্তন হ’লে আমি সেই পৰিৱৰ্তন গ্ৰহণ কৰিব লাগিব।’

Related Articles

Check Also

Close
error: Content is copy right protected !!
Close